पिंपरी चिंचवड, ता. २६: पिंपरी चिंचवड अॅडव्होकेट्स बार असोसिएशनतर्फे संविधान दिनाचा कार्यक्रम मोठ्या उत्साहात आणि गौरवपूर्ण वातावरणात पार पडला. कार्यक्रमास विविध मान्यवर अधिवक्त्यांची उपस्थिती लाभली.
कार्यक्रमाची सुरुवात संविधान पुस्तिका व प्रास्ताविकेचे पूजन करून करण्यात आले. कार्यक्रमामध्ये अॅडव्होकेट्स बार असोसिएशनचे माजी अध्यक्ष अॅड. दिनकर बारणे व सभासद अॅड. धम्मराज साळवे यांनी मनोगत व्यक्त करत उपस्थित सर्वांना संविधान दिनाच्या शुभेच्छा दिल्या. दोन्ही मान्यवरांनी भारतीय संविधानाची महान परंपरा, त्यातील मूल्यं, न्यायव्यवस्थेची अधिष्ठानं आणि नागरिकांच्या कर्तव्यांचे महत्त्व अधोरेखित केले.
त्याचबरोबर बारचे अध्यक्ष अॅड. गौरव वाळुंज यांनी स्वातंत्र्य, समता, बंधुता आणि संविधानातील इतर मूल्यांचे तंतोतंत पालन प्रत्येक नागरिकांनी केले पाहिजे असे मत व्यक्त केले.
कार्यक्रमाचे प्रास्ताविक आणि संविधानाच्या प्रास्ताविकेचे सामूहिक वाचन हे अॅड. उमेश खंदारे यांच्या नेतृत्वाखाली करण्यात आले. सामूहिक वाचनादरम्यान सर्व उपस्थितांनी संविधानातील तत्त्वांची पुनःप्रतिज्ञा करत भारतीय लोकशाहीला बळकटी देण्याचा संकल्प व्यक्त केला.
कार्यक्रमाच्या आभारप्रदर्शन अॅड. संकेत सरोदे यांनी केले. त्यांनी कार्यक्रमाला उपस्थित राहिलेल्या सर्व वकील बांधवांचे, संयोजकांचे व सहकार्यकर्त्यांचे मनःपूर्वक आभार व्यक्त केले. पिंपरी चिंचवड अॅडव्होकेट्स बार असोसिएशनतर्फे संविधान दिनाचा हा उपक्रम अत्यंत यशस्वीपणे पार पडला.
यावेळी बारचे माजी अध्यक्ष अॅड. दिनकर बारणे, अॅड. सुदाम साने, माजी उपाध्यक्ष अॅड. योगेश थंबा, विद्यमान उपाध्यक्ष अॅड.अनिल पवार, अॅड. रीना मगदूम, ज्येष्ठ विधीज्ञ वालेचा सर, अॅड. गणेश राऊत, अॅड. संतोष मोरे, अॅड. विकास शर्मा, अॅड. सौरभ काटे, अॅड. सनी काटे व मोठ्या प्रमाणात वकील बांधव उपस्थित होते.
🖋️संपादक – सुवर्णा गवारे🖋️
