पिंपरी, दि. १३: जागतिक महिला दिनाचे औचित्य साधून रविवार, दिनांक ८ मार्च, २०२६ रोजी वीर संभाजी जेष्ठ नागरिक संघ रहाटणी, पिंपळे सौदागर यांच्या वतीने चॅलेंजर पब्लिक स्कूल पिंपळे सौदागर येथे जागतिक महिला दिन साजरा करण्यात आला. कार्यक्रमाची सुरुवात दीप प्रज्वलनाने व स्वागत गीताने करण्यात आली .
कार्यक्रमाच्या सुरुवातीला समाज प्रबोधनकार सौ. शारदाताई मुंडे यांनी आईच्या काळजातूनः अशी संकल्पना घेऊन शिवबाची जिजाऊ, व्हय म्या सावित्री, पुण्यश्लोक अहिल्याबाई होळकर आणि म्या सायबाची रमा (सूर्याची सावली) असे विविध एकपात्री प्रयोग सादर केले.
कार्यक्रमाच्या उद्घाटक प्रा. शिल्पा मोरे यांनी आपले मनोगत व्यक्त करताना सांगितले की, आजच्या युगात महिलांनी सशक्त बनलं पाहिजे. महिलांनी सावित्रीमाई सारखे काम केले पाहिजे. बुद्धाच्या शिकवणीनुसार मुलांना सुसंस्कृत बनवून त्यांना उच्च विद्याविभूषित करण्याची जबाबदारी आजच्या जागतिक माहिला दिनी स्वीकारली पाहिजे.
वक्त्या व अंधश्रद्धा आणि महिलांची भूमिका या विषयावर महाराष्ट्र अंधश्रद्धा निर्मूलन समिती, पिंपरी चिंचवड शाखेच्या शुभांगी घनवट यांनी सांगितले की, समाजातील अंधश्रद्धेसारखी कुप्रथा नष्ट करण्यासाठी आपल्या घरातून सुरुवात होणे आवश्यक आहे, लहान मुलावर जसे बिंबवले तसे ते अनुकरण करत असतात, त्यांच्यावर सत्य बिंबवले तर ते सत्यच बोलतात, खोटे बिंबवले तर ते खोटेच बोलतात. भूतखेत, भानामती हे काही नाही, भूत आहे म्हणणे म्हणजे आपले मन भित्रे आहे असे समजावे असे त्यांनी प्रतिपादन केले.
कार्यक्रमाच्या अध्यक्षा व प्रमुख वक्त्या सुनंदा वाघमारे यांचे चवदार तळे सत्याग्रह – शतक महोत्सवी वर्ष या विषयावर भाषण झाले. बाबासाहेबांनी चवदार तळ्याचा सत्याग्रह करून त्यावेळी समाजात असलेली विषमता दूर करण्यासाठी समानतेचा संदेश दिला. बाबासाहेबांनी सलग तीन दिवस महाड येथे सत्याग्रह केला. तिसरा दिवस केवळ स्त्रियांसाठी ठेवून त्यांनी स्त्रियांचे प्रबोधन केले.
पती, मुलगा अगर घरातील पुरुष दारू पिऊन आला तर त्यासाठी स्त्रियांनी आपल्या घराचे दरवाजे बंद करावेत असा संदेश त्यांनी त्यावेळी स्त्रियांसाठी देऊन स्त्री-पुरुष समानतेची हाक दिली होती.
कार्यक्रमाचे निवेदन प्रा. डॉ. दिपाली धाईंजे यांनी केले. प्रा. डॉ. दीपा जामनिक यांनी आभार व्यक्त केले.
कार्यक्रमाला चॅलेंजर पब्लिक स्कूलच्या संचालिका व नगरसेविका तसेच रहाटणी व पिंपळे सौदागर या दोन्ही प्रभागातील नगरसेविका आणि नगरसेवक हजर होते. तसेच वीर संभाजी जेष्ठ नागरिक संघाचे अध्यक्ष रमेश उंदीरवाडे, सचिव पुरुषोत्तम गाणार, संघाचे सर्व महिला व पुरुष सभासद, परिसरातील महिला व नागरिक बहुसंख्येने उपस्थित होते. समूहगीत गायन मंच वीर संभाजी जेष्ठ नागरिक संघ महिला विभागाने गायलेल्या राष्ट्रगीताने कार्यक्रमाची सांगता झाली.
🖋️संपादक – सुवर्णा गवारे🖋️
