पिंपरी, दि. 5 जून 2025: जागतिक पर्यावरण दिनानिमित्त पिंपरी चिंचवड महानगरपालिका आणि टपरी पथारी हातगाडी पंचायत यांच्या संयुक्त विद्यमाने भोसरी परिसरात स्वच्छता मोहीम आणि प्लास्टिक कचऱ्याची योग्य विल्हेवाट लावण्यासाठी विशेष उपक्रम राबवण्यात आला. या उपक्रमाचे उद्दिष्ट पर्यावरण संरक्षणाला चालना देणे आणि स्थानिक स्तरावर स्वच्छता राखणे हे होते.
पिंपरी चिंचवड महानगरपालिकेचे आयुक्त श्री. शेखर सिंह, उपायुक्त श्री. राजेश आगळे, आणि आरोग्य अधिकारी श्री. अतुल सोनवणे यांच्या मार्गदर्शनाखाली हा उपक्रम यशस्वीपणे पार पडला. टपरी पथारी हातगाडी पंचायत यांच्या सहकार्याने भोसरी परिसरातील रस्ते, बाजारपेठा आणि सार्वजनिक ठिकाणी स्वच्छता मोहीम राबवण्यात आली. यामध्ये प्लास्टिक कचरा गोळा करून त्याची योग्य पद्धतीने विल्हेवाट लावण्यात आली, जेणेकरून पर्यावरणाचे संरक्षण व्हावे.
या उपक्रमात टपरी पथारी हातगाडी पंचायतचे अध्यक्ष व कष्टकऱ्यांचे नेते श्री. बाबा कांबळे, सरचिटणीस श्री. प्रकाश यशवंते, सल्लागार श्री. बाळासाहेब चव्हाण, विभाग अध्यक्ष श्री. रोहित तापकीर, शाखा अध्यक्ष श्री. प्रदीप पाटील, श्री. यश जगताप, श्री. मदन मगर, श्री. संजय हरणे, श्री. दिनेश कांबळे यांच्यासह अनेक पदाधिकारी आणि कार्यकर्ते सक्रियपणे सहभागी झाले.
पिंपरी चिंचवड महानगरपालिका उपआयुक्त श्री. राजेश आगळे यांनी या उपक्रमाचे कौतुक करताना सांगितले, “पर्यावरण संरक्षण आणि स्वच्छता ही आपल्या सर्वांची जबाबदारी आहे. टपरी पथारी हातगाडी पंचायत यांच्यासोबतच्या या संयुक्त उपक्रमामुळे भोसरी परिसरात स्वच्छतेचा संदेश प्रभावीपणे पोहोचला आहे.”
टपरी पथारी हातगाडी पंचायतचे अध्यक्ष श्री. बाबा कांबळे म्हणाले, “आम्ही फेरीवाले आणि हातगाडी व्यावसायिक स्वच्छतेचे महत्त्व समजून पर्यावरण संरक्षणासाठी कटिबद्ध आहोत. पिंपरी चिंचवड महानगरपालिकेच्या सहकार्याने आम्ही अशा उपक्रमांना भविष्यातही गती देऊ.”
हा उपक्रम स्वच्छ भारत मिशन आणि प्लास्टिक बंदी या केंद्र सरकारच्या योजनांशी सुसंगत असून, स्थानिक पातळीवर स्वच्छता आणि पर्यावरण जागरूकता वाढवण्यासाठी महत्त्वपूर्ण ठरला आहे.
या स्वच्छता अभियानामध्ये टपरी पथारी हातगाडी धारक फळभाजी विक्रेते कष्टकरी पुरुष व महिला मोठ्या संख्येने सहभागी झाले होते 200 पेक्षा अधिक महिला पुरुषांनी या उपक्रमात सहभाग घेऊन या भागातील सर्व रस्ते साफ करून चकाचक केले,
🖋️संपादक – सुवर्णा गवारे🖋️
