पिंपरी, ता. २०: पिंपरी चिंचवड शहरात उभारण्यात येत असलेल्या नवीन न्यायालय संकुलासमोर भारतरत्न डॉ. बाबासाहेब आंबेडकर यांचा सन्मानपूर्वक आणि शासकीय पातळीवर अधिकृत पुतळा उभारण्याची मागणी वरिष्ठ उपाध्यक्ष, राष्ट्रवादी काँग्रेस पक्ष – शरदचंद्र पवार अॅड. धम्मराज साळवे यांनी महापालिका आयुक्त यांच्याकडे केली आहे.
भारताच्या संविधानाचे शिल्पकार, महान विधिज्ञ, अर्थतज्ज्ञ, मानवतावादी आणि सामाजिक क्रांतीचे प्रणेते म्हणून डॉ. बाबासाहेब आंबेडकर यांचे राष्ट्रघडणीत अमूल्य योगदान आहे. त्यांनी केवळ वंचित घटकांना न्याय मिळवून देण्याचे काम केले नाही, तर संपूर्ण भारतीय समाजाला समानता, बंधुता आणि न्याय या तत्त्वांच्या दिशेने मार्गदर्शन केले.
देशाच्या सर्वोच्च न्यायालयाच्या प्रांगणात — दिल्ली येथील सुप्रीम कोर्टात — बाबासाहेबांचा भव्य पुतळा उभारलेला आहे, जो केवळ एक स्मारक नसून भारतीय न्यायव्यवस्थेच्या मूलभूत तत्त्वांचा प्रतीकात्मक स्तंभ मानला जातो. ही परंपरा अनेक राज्यांतील उच्च न्यायालयांनाही प्रेरणा देत आहे.
त्याच धर्तीवर, पिंपरी चिंचवड शहरातील नवीन न्यायालयाच्या प्रांगणात, अथवा मुख्य प्रवेशद्वाराजवळ, भारतरत्न डॉ. बाबासाहेब आंबेडकर यांचा शासकीय मान्यतेसह भव्य पुतळा उभारण्यात यावा, ही आमची कळकळीची विनंती आहे.
सदर प्रस्तावामागील हेतू व महत्त्व:
- भारतीय न्यायव्यवस्थेचे प्रतीक: पुतळा हा न्याय, समता आणि संविधानिक मूल्यांचा सतत स्मरण करून देणारा शाश्वत प्रतीक ठरेल.
- सामाजिक समरसतेस चालना: विविध सामाजिक स्तरांतील नागरिकांमध्ये एकात्मता, अभिमान आणि संविधानावरील श्रद्धा दृढ होईल.
- शैक्षणिक व प्रेरणादायी ठिकाण: विद्यार्थ्यांसह नागरिकांसाठी हा पुतळा संविधान व डॉ. आंबेडकर यांच्या विचारांचे ज्ञान देणारा मार्गदर्शक ठरेल.
- सांस्कृतिक व ऐतिहासिक महत्त्व: पिंपरी चिंचवड शहरात सामाजिक परिवर्तनाचा इतिहास असल्याने, या पुतळ्यामुळे शहराची सामाजिक भान आणि जाणीव अधोरेखित होईल.
- नवीन न्यायालयाच्या ठिकाणी संविधान व कायदा सन्मानार्थ बाबासाहेब आंबेडकर यांचा पुतळा उभारण्यासाठी प्रस्तावित जागा निश्चित करण्यात यावी.
- सदर प्रस्तावासाठी शासन स्तरावरून मंजुरी मिळवून महापालिका निधीतून किंवा सामाजिक समर्पण निधी (CSR) मधून निधीची तरतूद करण्यात यावी.
- पुतळा उभारणीसाठी विशेष समिती गठीत करून त्या माध्यमातून डिझाइन, साहित्य, उभारणी यावर जनतेचा सहभाग घेऊन निर्णय घेण्यात यावा.
- पुतळा उभारल्यावर त्याभोवती संविधान चौक, संविधान स्तंभ अथवा विचारधारा प्रदर्शन गॅलरी उभारण्यात यावी, जेणेकरून सार्वजनिक शिक्षणास चालना मिळेल.
आपण या विषयाची गांभीर्याने दखल घेऊन, तात्काळ आवश्यक त्या हालचाली कराल, अशी आम्हाला अपेक्षा आहे.हा प्रस्ताव केवळ एखाद्या समाजघटकाच्या भावना पूर्ण करण्यासाठी नाही, तर समाजप्रबोधन व न्यायमूल्यांची जनजागृती साधण्यासाठीचा विधायक उपक्रम आहे.
🖋️संपादक – सुवर्णा गवारे🖋️
