वाल्हेकरवाडीतील ‘विजय संकल्प’ सभेत उपमुख्यमंत्र्यांचे गौरोद्गार
पिंपरी, ता. ७ : ‘प्रभाग क्रमांक १६ मधून आधी मोरेश्वरला नगरसेवक करा, त्यानंतर त्याला आमदारकी द्यायची आहे. हे सर्व माझे जीवाभावाचे सहकारी आहेत,’ असे ठाम व गौरवास्पद विधान उपमुख्यमंत्री तथा पालकमंत्री यांनी मंगळवारी (ता. ६) वाल्हेकरवाडी येथे आयोजित ‘विजय संकल्प’ सभेत केले. त्यांच्या या वक्तव्याने सभास्थळी जल्लोष उसळला.
या वेळी अक्षय तरस, तानाजी भोंडवे, दिवाणजी भोंडवे, कुणाल भोंडवे यांच्यासह राष्ट्रवादी काँग्रेसचे पदाधिकारी, कार्यकर्ते आणि परिसरातील नागरिक मोठ्या संख्येने उपस्थित होते.अजित पवार म्हणाले, प्रभाग क्रमांक १६ मध्ये राष्ट्रवादी काँग्रेसने श्रेया तरस–गायकवाड या नव्या चेहऱ्याला संधी दिली आहे. अशा नव्या चेहऱ्यांना प्रशिक्षण देऊन कामाची संधी देणे, नागरिकांचे प्रश्न कसे सोडवायचे याकडे लक्ष देणे, हे आमचे धोरण आहे.
जयश्री भोंडवे यांच्या निवडणूक चिन्हाबाबत अडचण निर्माण झाली होती; मात्र न्यायालयाने त्यांना न्याय दिला. आम्ही जे करतो ते खोटं नाही, खरंच करतो,असा टोला त्यांनी लगावला. तानाजी भोंडवे यांनी अनेक वर्षे केलेल्या कामामुळे आशा भोंडवे यांना संधी देण्यात आल्याचेही त्यांनी स्पष्ट केले.
आता कारभारी बदलायची वेळ आली आहे, असे सांगत पवारांनी सत्ताधाऱ्यांवर हल्लाबोल केला. श्रीमंत महानगरपालिका कर्जबाजारी होत चालली असून नसबंदी आणि प्रधानमंत्री आवास योजनेत मोठे घोटाळे झाले आहेत. हे चित्र बदलण्यासाठी आमचे उमेदवार घड्याळ’ चिन्ह घेऊन घराघरांत जात आहेत.आमची सत्ता आल्यानंतर कायदा-सुव्यवस्था सक्षम ठेवली जाईल, कोयता गँगसारख्या प्रवृत्तींना पायबंद घातला जाईल, असेही ते म्हणाले.
पुणे आणि पिंपरी-चिंचवड क्रमांक एक बनवायचे असतील तर नियमित पाणीपुरवठा, कचरा व्यवस्थापन, वाहतूक कोंडी यावर ठोस उपाय हवेत. अनधिकृत बांधकामे, विद्युत वाहिन्यांचे अडथळे, पार्किंग समस्या यावर निर्णय घ्यावे लागतील. टेंडर रिंगमधून कोट्यवधींचा घोटाळा झाल्याचा आरोप करत भ्रष्टाचाराच्या बकासुराला हद्दपार करायचे आहे, असेही पवार म्हणाले.
संगणकानंतर आता एआयचे युग आहे. या क्रांतीत शहराला पुढे न्यायचे आहे. हिंजवडी आयटी पार्क आम्ही आणला; पिंपरी-चिंचवडमध्ये बदल घडवून दाखवले. मात्र गेल्या सात-आठ वर्षांत शहराचे नुकसान झाले. त्यामुळे सत्ताबदल अपरिहार्य आहे,असा निर्धार त्यांनी व्यक्त केला.
प्रभाग १६ मधील पॅनल प्रमुख व सर्वसाधारण गट ‘ड’चे उमेदवार माजी नगरसेवक मोरेश्वर भोंडवे, नागरिकांचा मागास प्रवर्ग ‘ब’ गटाच्या उमेदवार जयश्री भोंडवे, सार्वत्रिक महिला ‘क’ गटाच्या आशा भोंडवे आणि अनुसूचित जाती ‘अ’ गटाच्या श्रेया तरस–गायकवाड यांना प्रचंड मताधिक्याने विजयी करण्याचे आवाहन अजित पवार यांनी केले.
🖋️संपादक – सुवर्णा गवारे🖋️
