पिंपरी, दि. १३ : हिंदुस्थान एंटिबायोटिक्स लिमिटेड (HAL), ने कंपनीची स्थिती, नियामक अनुपालन आणि अंतर्गत प्रशासकीय बाबींविषयी माध्यमे व विविध सार्वजनिक मंचांवर प्रसारित होत असलेल्या काही दिशाभूल करणाऱ्या बातम्या आणि आरोपांची गंभीर दखल घेतली आहे.
HAL स्पष्टपणे सांगितले आहे की, कंपनी बंद झालेली नाही आणि तिचे सर्व कामकाज व कार्यप्रणाली नियमितपणे सुरू आहेत. कंपनीने आपले उत्पादन किंवा इतर कार्ये बंद केल्याचे वृत्त पूर्णपणे खोटे, दिशाभूल करणारे आणि वस्तुस्थितीच्या विरोधात आहे.
भारत सरकारने अधिसूचित केलेल्या सुधारित शेड्यूल-M च्या अंमलबजावणीसाठी HAL. उत्पादन कार्यात कोणताही अडथळा न आणता टप्याटप्प्याने पायाभूत सुविधा उन्नतीकरण, गुणवत्ता व्यवस्थापन प्रणालीतील सुधारणा आणि प्रक्रियात्मक बदल करत आहे. नियामक आवश्यकता आणि मंजूर वेळापत्रकानुसार अनुपालन प्रक्रिया नियोजनबद्ध आणि टप्प्याटप्प्याने राबविली जात आहे. कंपनी आपल्या पुनरुज्जीवन व आधुनिकीकरण उपक्रमांसह संपूर्ण अनुपालन साध्य करण्यासाठी कटिबद्ध आहे.
काही वृत्तांमधून नियामक प्राधिकरणांनी HAL बंद करण्याचे निर्देश दिले आहेत किंवा कंपनी नियामक निकष पूर्ण करण्यास असमर्थ आहे, असा चुकीचा समज निर्माण करण्याचा प्रयत्न करण्यात आला आहे. असे सर्व दावे वस्तुस्थितीशी विसंगत व चुकीचे आहेत. HAL नियामक प्राधिकरणांशी सातत्याने समन्वय राखत असून सर्व लागू कायदेशीर व नियामक तरतुदींचे पालन करण्यास वचनबद्ध आहे.
सेवा अभिलेखांच्या अंतर्गत पडताळणीदरम्यान तसेच सेवा अभिलेखांच्या पुढील छाननीदरम्यान उपमहाव्यवस्थापक (उत्पादन) श्री अनुज कुमार सिंह यांनी सादर केलेल्या कागदपत्रांमध्ये काही विसंगती आढळून आल्या. त्यानुसार कंपनीच्या लागू आचार, शिस्त व अपील नियमांनुसार त्यांच्याविरुद्ध विविध कारणांवरून शिस्तभंगाची कार्यवाही सुरू करण्यात आली आहे. चौकशी पूर्ण होईपर्यंत सक्षम प्राधिकाऱ्यांनी श्री अनुज कुमार सिंह यांना निलंबित केले आहे. सदर शिस्तभंगाची कार्यवाही सध्या सुरू असून ती कायदा आणि नैसर्गिक न्यायाच्या तत्त्वांनुसार केली जात आहे.
HAL ने असेही निदर्शनास आणले आहे की शिस्तभंगाची कार्यवाही सुरू झाल्यानंतर कंपनी व तिच्या व्यवस्थापनाविषयी विविध प्राधिकरणे आणि माध्यमांपुढे चुकीची व दिशाभूल करणारी माहिती, तक्रारी आणि आरोप प्रसारित करण्यात येत आहेत. कंपनी अशा सर्व आरोपांचे ठामपणे खंडन करते आणि स्पष्ट करते की तिची सर्व कार्ये व निर्णय हे अधिकृत कर्तव्याच्या पूर्ततेसाठी तसेच लागू नियम व प्रक्रियांनुसारच घेतले गेले आहेत.
HAL ने हेही नोंदवले आहे की श्री अमित पारिख, जे पूर्वी आयुष हेल्थकेअरमार्फत संपर्क अधिकारी/मध्यस्थ म्हणून HAL शी संबंधित होते आणि ज्यांचा कंपनीशी संबंध नंतर समाप्त करण्यात आला, ते HAL आणि तिच्या व्यवस्थापनाविषयी दिशाभूल करणारी माहिती प्रसारित करण्यात सक्रिय असल्याचे समोर आले आहे. कंपनी या प्रकरणाची तपासणी करत असून खोटी माहिती पसरविणाऱ्या, अधिकृत प्रक्रियांमध्ये हस्तक्षेप करणाऱ्या किंवा कंपनीच्या प्रतिमा व हितसंबंधांना हानी पोहोचविणाऱ्या कोणत्याही व्यक्तीविरुद्ध योग्य ती कायदेशीर कारवाई करण्याचा अधिकार राखून ठेवते.
खोटी आणि दिशाभूल करणारी माहिती प्रसारित करणाऱ्या व्यक्तींविरुद्ध HAL च्या विधी विभागाच्या सल्ल्यानुसार आवश्यक कायदेशीर कारवाई करण्यात येईल.
HAL पारदर्शकता, उत्तरदायित्व, प्रामाणिकपणा, नियामक अनुपालन आणि जनहिताच्या संरक्षणासाठी पूर्णपणे कटिबद्ध आहे. कंपनी सर्व माध्यम संस्था, पत्रकार, डिजिटल प्लॅटफॉर्म आणि नागरिकांना विनंती करते की HAL संदर्भातील कोणतीही माहिती प्रकाशित किंवा प्रसारित करण्यापूर्वी अधिकृत स्रोतांकडून तथ्यांची पडताळणी करावी.
🖋️संपादक – सुवर्णा गवारे🖋️
